ٹائپ 2 ذیابیطس ایک ایسی حالت ہے جو وقت کے ساتھ آہستہ آہستہ نشوونما پاتی ہے جس کی علامات اکثر شروع میں واضح نہیں ہوتیں۔
تاہم تحقیق سے پتہ چلتا ہے کہ کچھ ابتدائی انتباہی علامات ایسی ہیں جو لوگوں کو مرض پہچاننے میں مدد کر سکتی ہیں۔
ٹائپ 2 ذیابیطس کی سب سے عام ابتدائی علامات میں سے ایک بار بار پیشاب آنا ہے۔ مطالعات سے پتہ چلتا ہے کہ ہائی بلڈ شوگر والے افراد کو صحت مند افراد کے مقابلے میں زیادہ پیشاب آتا ہے۔
ایک اور ابتدائی علامت ضرورت سے زیادہ پیاس ہے۔ چونکہ جسم پیشاب کے ذریعے زیادہ سیال کھو رہا ہوتا ہے، جسم پیاس کو بڑھا کر اس نقصان کو پورا کرنے کی کوشش کرتا ہے۔
غیر واضح وزن میں کمی بھی ابتدائی علامت ہوسکتی ہے۔ اگرچہ ٹائپ 2 ذیابیطس کا تعلق عام طور پر وزن میں اضافے سے ہوتا ہے لیکن کچھ لوگ اچانک وزن میں کمی کا تجربہ کرسکتے ہیں۔
کھانے کے بعد بھی بھوک لگنا، تھکاوٹ اور کم توانائی کی سطح بھی ابتدائی انتباہی علامات ہیں۔
اس کے علاوہ زخموں کا سست روی سے بھرنا اور دھندلا نظر آنا ایک اور ابتدائی علامت ہو سکتی ہے۔
ہاتھوں اور پیروں میں چُبھن یا بے حسی اور جلد پر سیاہ دھبے، خاص طور پر گردن، بغلوں یا کمر کے گرد بھی ٹائپ 2 ذیابیطس کا ایک عام ابتدائی مرحلہ ہو سکتا ہے۔