ملک بھر کے 44 اضلاع سے حاصل کردہ 34 ماحولیاتی نمونوں میں سے 22 میں پولیو وائرس کی تصدیق ہوئی ہے۔
ملک بھر میں پولیو وائرس کی مؤثر نگرانی جاری ہے، نیشنل ایمرجنسی آپریشنز سینٹر کے تحت 44 اضلاع سے 56 ماحولیاتی نمونے جمع کیے گئے جن میں سے 34 ماحولیاتی نمونے منفی نکلے جبکہ 22 ماحولیاتی نمونوں میں پولیو وائرس کی موجودگی کی تصدیق ہوئی۔
نیشنل ایمرجنسی آپریشنز سینٹر کے مطابق فروری اور اپریل کی مہمات کے نتیجے میں وائرس کے پھیلاؤ میں نمایاں کمی دیکھی جارہی ہے، رواں سال کی دوسری قومی پولیو مہم 21 سے 27 اپریل تک کامیابی کے ساتھ منعقد کی گئی، مہم کے دوران 4 کروڑ 53 لاکھ سے زائد بچوں کو پولیو کے قطرے پلائے گئے۔
نیشنل ایمرجنسی آپریشنز سینٹر کے مطابق پنجاب اور سندھ 100 فیصد، خیبرپختونخوا 101 فیصد، بلوچستان میں 102 فیصد بچوں کی ویکسینیشن مکمل ہوگئی جب کہ اسلام آباد 106 فیصد، آزاد کشمیر 100 فیصد، اور گلگت بلتستان میں 101 فیصد بچوں کی ویکسینیشن مکمل ہوئی ہے۔
نیشنل ایمرجنسی آپریشنز سینٹر نے کہا ہے کہ آئندہ ماہ سال 2025ء کی تیسری پولیو مہم کا انعقاد کیا جائے گا، والدین سے اپیل ہے کہ وہ پولیو ورکرز کے ساتھ اپنا بھرپور تعاون جاری رکھیں، ہر مہم کے دوران پانچ سال سے کم عمر بچوں کو پولیو کے قطرے لازمی پلوائیں، یاد رکھیں، ویکسین کی اضافی خوراکیں بچوں کی قوت مدافعت کو مزید مضبوط بناتی ہیں۔