اسپغول کو عام طور پر پانی یا چھاچھ کے ساتھ ملا کر استعمال کیا جاتا ہے اور یہ خاص طور پر قبض دور کرنے کے لیے مؤثر سمجھا جاتا ہے۔ اس کا ذائقہ ہلکا ہوتا ہے، لیکن اثر بہت زیادہ محسوس ہوتا ہے۔
ماہرین کے مطابق اسپغول صرف قبض کے علاج تک محدود نہیں بلکہ اس کے کئی دیگر طبی فوائد بھی ہیں۔
یہ نظامِ ہضم کو بہتر بناتا ہے، آنتوں کی صفائی کرتا ہے، بلڈ شوگر کو کنٹرول کرنے میں مدد دیتا ہے، کولیسٹرول کم کرتا ہے اور وزن گھٹانے والوں کے لیے بھی مفید ہے۔
اسی وجہ سے بہت سے لوگ اسپغول کو روزانہ استعمال کرتے ہیں، لیکن سوال یہ ہے کہ کیا روزانہ اسپغول لینا واقعی محفوظ ہے؟
ماہرین صحت کے مطابق، اگر کبھی کبھار قبض کی شکایت ہو تو اسپغول لینا فائدہ مند ہو سکتا ہے، لیکن اسے طویل مدت یا روزانہ بغیر ڈاکٹر کے مشورے کے استعمال کرنا مناسب نہیں۔
اگر آپ طویل عرصے تک اسپغول یا کسی بھی بیرونی فائبر پر انحصار کریں گے تو یہ آپ کے قدرتی نظامِ ہضم کو کمزور کر سکتا ہے، اس لیے اعتدال کے ساتھ استعمال کرنا بہتر ہے۔
اس کے علاوہ، زیادہ فائبر لینے سے بعض اوقات جسم میں ضروری غذائی اجزاء کی جذب ہونے کی صلاحیت متاثر ہو سکتی ہے اور اگر اسپغول لینے کے ساتھ پانی کی مناسب مقدار نہ پی جائے تو پانی کی کمی (ڈی ہائیڈریشن) اور قبض کی شکایت مزید بڑھ سکتی ہے۔
اس کا طویل مدت تک استعمال کب کرنا چاہیے؟
اگر قبض شدید اور مستقل ہو، تو ڈاکٹر کے مشورے سے اسپغول کو طویل مدت تک استعمال کیا جا سکتا ہے۔
لیکن اس کے لیے صحیح خوراک، استعمال کا طریقہ اور دورانیہ جاننا بہت ضروری ہے۔ بغیر ڈاکٹر کے مشورے کے طویل استعمال سے پرہیز کریں، کیونکہ اسپغول کے کچھ سائیڈ ایفیکٹس بھی ہو سکتے ہیں۔
قدرتی غذا کو ترجیح دیں
ماہرین کا مشورہ ہے کہ دائمی قبض یا ہاضمے کے دیگر مسائل کے علاج کے لیے خوراک میں بہتری لانا زیادہ مؤثر اور محفوظ طریقہ ہے۔
اپنی روزمرہ غذا میں فائبر سے بھرپور سبزیاں، پھل، اور دلیے جیسے غذائیں شامل کریں، اور وافر مقدار میں پانی پینا نہ بھولیں۔
صرف وقتی ضرورت پڑنے پر اسپغول کا استعمال کریں اور روزانہ استعمال سے قبل اپنے معالج سے مشورہ ضرور کریں۔