محکمہ موسمیات نے موزوں موسمی حالات اور سیلاب کے پانی کی نکاسی میں رکاوٹ کے باعث 20 ستمبر سے کراچی، لاہور، اسلام آباد سمیت ملک کے 10 بڑے شہروں میں ڈینگی کی شدید اور غیر معمولی وبا کے پھیلنے کا خدشہ ظاہر کرتے ہوئے ڈینگی الرٹ جاری کر دیا ہے۔
محکمہ موسمیات کے مطابق تاریخی رجحانات، موجودہ اور متوقع موسمی حالات، اور سیلاب کے جمع شدہ پانی نے ڈینگی کے پھیلاؤ کے لیے سازگار ماحول پیدا کر دیا ہے۔
ماہرین کے مطابق اس موسم میں خصوصاً کراچی، لاہور، اسلام آباد، فیصل آباد، سیالکوٹ، راولپنڈی، پشاور، سکھر، حیدرآباد اور ملتان سمیت دیگر سیلاب زدہ علاقوں میں ڈینگی کے خطرات بڑھ گئے ہیں۔
محکمہ موسمیات نے تمام شراکت داروں بشمول ضلعی انتظامیہ، محکمہ صحت اور عوام کو فوری احتیاطی اقدامات اپنانے کی ہدایت کی ہے۔
انتباہ میں کہا گیا ہے کہ قومی صحت کے ادارے اور ڈینگی کنٹرول سینٹرز ہائی الرٹ رہیں، ہسپتالوں کی تیاری بہتر بنائی جائے، اور مچھر مار کارروائیاں تیز کی جائیں۔
محکمہ موسمیات نے مزید ہدایت کی کہ ماحولیاتی اور موسمیاتی ڈیٹا جیسے درجہ حرارت، نمی اور بارش کا باقاعدہ جائزہ لیا جائے تاکہ ڈینگی کے خطرے کے اوقات کی پیشگی نشاندہی کی جا سکے۔
انتباہ میں عوام کو وسیع پیمانے پر اسپرے، لاروی سائیڈ کا استعمال، نالوں اور سیلاب زدہ علاقوں میں جمع پانی کی صفائی، اور شیلٹرز میں مچھر کنٹرول اقدامات کرنے کا کہا گیا ہے۔
مزید یہ کہ عوامی آگاہی مہمات ٹی وی، ریڈیو، سوشل میڈیا، مساجد اور مقامی کمیونٹی رہنماؤں کے ذریعے چلائی جائیں تاکہ لوگ بروقت بچاؤ اور طبی مشورے کی طرف راغب ہوں۔
انتباہ میں تجویز دی گئی ہے کہ نیشنل اور صوبائی ڈیزاسٹر مینجمنٹ اتھارٹیز کے ساتھ مل کر کام کیا جائے تاکہ ریلیف کیمپوں اور پناہ گاہوں کو زیادہ سے زیادہ خشک رکھا جائے اور صاف پانی و صفائی کے انتظامات کے ذریعے مچھر کی افزائش کو روکا جا سکے۔
ڈینگی کے حوالے سے جاری کردہ انتباہ میں عوام کو ہدایت کی گئی ہے کہ گھروں کے اطراف پانی جمع کرنے والی اشیا (پرانے ٹائر، بالٹیاں، کچرا، ترپال وغیرہ) کو ہٹا دیں یا خالی کردیں اور پانی ذخیرہ کرنے والے برتنوں کو اچھی طرح ڈھانپ کر رکھیں۔
عوام کو ہدایت کی گئی ہے کہ خصوصاً صبح سویرے اور شام کے اوقات میں مچھر بھگانے والی دوا، جالی، کوائل وغیرہ استعمال کریں اور مچھر کے زیادہ فعال اوقات میں لمبی آستین والی قمیص اور پینٹ پہنیں جبکہ کھڑکیاں اور دروازے جالی دار رکھیں یا بند رکھیں۔
عوام کو ہدایت کی گئی ہے کہ سیلاب زدہ یا خیمہ بستی والے علاقوں میں صفائی کا خاص خیال رکھیں، خیموں کے آس پاس پانی جمع نہ ہونے دیں، پانی ابال کر یا صاف کر کے استعمال کریں اور ماحول کو صاف ستھرا رکھیں۔