کافی پینے کا بہترین وقت کونسا ہوتا ہے؟ نئی تحقیق میں بتادیا

ایک نئی تحقیق کے مطابق صبح کے اوقات میں کافی پینا دل کی صحت کے لیے بے حد مفید ثابت ہو سکتا ہے۔ یہ بات یورپین ہارٹ جرنل میں شائع ہونے والی ایک تحقیق میں سامنے آئی ہے۔

اس تحقیق کے مطابق صبح کے وقت کافی پینے والے افراد میں دل کی بیماری سے مرنے کا خطرہ کم ہوتا ہے۔ اس کے علاوہ ان افراد میں عمومی موت کا خطرہ بھی ان لوگوں کے مقابلے میں کم ہوتا ہے جو دن بھر کافی پیتے ہیں۔

تحقیق کے نتائج

امریکی یونیورسٹی ٹولین کے محققین کی تحقیق سے معلوم ہوا کہ صبح کے وقت کافی پینے والے افراد میں کسی بھی وجہ سے موت کا خطرہ 16 فیصد کم ہوتا ہے جبکہ دل کی بیماری سے مرنے کا خطرہ 31 فیصد کم پایا گیا۔ دن بھر کافی پینے والے افراد میں یہ فوائد نہیں دیکھے گئے اور ان کا خطرہ کافی نہ پینے والے افراد کے برابر تھا۔ ٹولین یونیورسٹی کے پروفیسر لو کی نے کہا، ’یہ پہلی تحقیق ہے جس میں کافی پینے کے وقت اور صحت کے نتائج کا تجزیہ کیا گیا۔ ہماری تحقیق سے پتہ چلتا ہے کہ کافی پینے کا وقت بھی اتنا ہی اہم ہے جتنا کہ کافی پینے کا فیصلہ یا اس کی مقدار۔‘

تحقیق کا طریقہ کار

یہ تحقیق 1999 سے 2018 کے درمیان 40 ہزار 725 بالغ افراد کے ڈیٹا پر مبنی ہے۔ شرکاء سے ان کے کھانے پینے کی عادات، خاص طور پر کافی پینے کے وقت اور مقدار کے بارے میں سوالات کیے گئے۔ ایک ذیلی گروپ، جس میں 1463 افراد شامل تھے، سے پورے ہفتے کی خوراک اور مشروبات کی تفصیلات فراہم کرنے کے لیے کہا گیا۔ ان معلومات کو 9 سے 10 سال تک کے عرصے میں موت کے ریکارڈز سے جوڑا گیا۔

نتائج کی تفصیلات

تحقیق میں شامل 35 فیصد لوگ صبح کے وقت کافی پینے والے تھے، 24 فیصد نے دن بھر کافی پی جبکہ 48 فیصد کافی نہیں پیتے تھے۔ تحقیق سے معلوم ہوا کہ صبح کے وقت کافی پینے والے افراد، چاہے وہ دو سے تین کپ پیتے ہوں یا تین کپ سے زیادہ، دل کی بیماریوں کے خطرے سے محفوظ رہتے ہیں۔ ایک کپ یا کم پینے والے افراد کو کم فائدہ ہوا۔

ممکنہ وجوہات

تحقیق میں کافی پینے کے وقت کے فوائد کی میکانزم کی وضاحت نہیں کی گئی، لیکن محققین کا کہنا ہے کہ دوپہر یا شام کے وقت کافی پینے سے جسم کے ہارمونز جیسے میلاٹونن متاثر ہو سکتے ہیں۔ پروفیسر لو کی کا کہنا تھا کہ مزید تحقیق کی ضرورت ہے تاکہ ان نتائج کی تصدیق ہو سکے۔