ماہرِ امراض چشم کا کہنا ہے کہ ایک نہایت آسان مشق کے ذریعے بینائی میں بہتری لائی جا سکتی ہے اور چشمے پر انحصار کم کیا جا سکتا ہے۔
آج کے دور میں بچے ہوں یا بڑے، ہر دوسرے شخص کو عینک کی ضرورت پیش آ رہی ہے۔ زیادہ تر لوگ دور کی اشیا واضح طور پر نہیں دیکھ پاتے اور انہیں چشمے کا سہارا لینا پڑتا ہے۔
غذائی قلت، ماحولیاتی آلودگی اور اسکرین کے حد سے زیادہ استعمال کو آنکھوں کی کمزوری کی بڑی وجوہات قرار دیا جاتا ہے۔
یہی وجہ ہے کہ اکثر لوگ یہ سوال کرتے ہیں کہ کیا کمزور ہو جانے والی بینائی دوبارہ تیز ہو سکتی ہے؟
ہندوستان ڈاٹ کام کے مطابق اس حوالے سے ڈاکٹر کلبیر جاکھڑ نے ایک سادہ مگر مؤثر مشق تجویز کی ہے۔
جو ان کے مطابق باقاعدگی سے کرنے پر بینائی بہتر بنا سکتی ہے اور چشمے کا نمبر کم کرنے میں بھی مددگار ثابت ہو سکتی ہے۔
ڈاکٹر کلبیر نے واضح کیا کہ کوئی ایسا جادوئی ڈراپ موجود نہیں جو بینائی کو اچانک درست کر دے۔ تاہم ایک آسان مشق آنکھوں کی صحت کے لیے انتہائی فائدہ مند ثابت ہو سکتی ہے۔
اس مشق میں ایک نقطے یا شمع کی روشنی پر بغیر پلک جھپکائے مسلسل نگاہ مرکوز رکھنی ہوتی ہے۔
ان کے مطابق، مستقل مزاجی سے کرنے پر یہ طریقہ کارگر ثابت ہوتا ہے اور عینک کا نمبر بھی کم کیا جا سکتا ہے۔
مشق کرنے کا طریقہ یہ ہے کہ ایک کاغذ پر چھوٹا سا نقطہ بنائیں اور اسے تقریباً 25 سینٹی میٹر کے فاصلے پر رکھ کر اس پر مسلسل نظر جمائے رکھیں۔
کوشش کریں کہ زیادہ دیر تک پلک نہ جھپکیں۔ جیسے ہی پلک جھپک جائے، مشق ختم سمجھیں۔
احتیاطی تدابیر اور مشورے
ڈاکٹر کلبیر کہتے ہیں کہ یہ مشق روزانہ کم از کم دو بار ضرور کریں اور ہر بار تقریباً دو منٹ تک جاری رکھیں۔
اگر آنکھوں کی کمزوری زیادہ ہو تو چشمہ مکمل طور پر نہیں ہٹ سکتا لیکن بینائی ضرور بہتر ہوگی۔ ساتھ ہی اپنی غذا پر توجہ دینا اور اسکرین ٹائم کم کرنا بھی ضروری ہے۔
یاد رکھیں، یہ طریقہ کوئی فوری علاج نہیں بلکہ ایک ریگولر مشق ہے جو وقت کے ساتھ فائدہ دیتی ہے۔
ڈاکٹر کے مطابق صبر اور تسلسل کے ساتھ یہ عمل کرنے سے آنکھوں کی روشنی کو کافی حد تک بہتر بنایا جا سکتا ہے۔