ہم روزمرہ زندگی میں اپنے پیروں کو چوٹ، مٹی اور موسم کی شدت سے بچانے کے لیے جوتے پہنتے ہیں، مگر ماہرینِ آرتھوپیڈکس خبردار کرتے ہیں کہ ہر وقت جوتے پہننا نقصان دہ ہو سکتا ہے۔
ماہرین کا کہنا ہے کہ مسلسل جوتے پہنے رہنے سے پاؤں کے عضلات سخت اور کمزور ہو جاتے ہیں کیونکہ جوتے پیروں کو ایک خاص حالت میں محدود کر دیتے ہیں۔
یہ جکڑاؤ پیروں کی قدرتی حرکت کو متاثر کرتا ہے، جس سے نہ صرف لچک اور طاقت کم ہو سکتی ہے بلکہ مجموعی جسمانی صحت پر بھی منفی اثرات پڑ سکتے ہیں۔
جوتے اور پاؤں کی جلد کے درمیان مسلسل رگڑ سے چھالے اور سخت جلد کے دھبے بن جاتے ہیں، جو نہ صرف تکلیف دہ ہوتے ہیں بلکہ آپ کی روزمرہ کی سرگرمیاں بھی متاثر کر سکتے ہیں۔
خاص طور پر تنگ یا غلط سائز کے جوتے اس مسئلے کو بڑھاتے ہیں۔
فنگل اور بیکٹیریل انفیکشنز
گرم اور مرطوب ماحول میں جوتے پہننے سے پاؤں میں پسینہ آتا ہے، جو جوتے کے اندر پھنس جاتا ہے۔
ڈاکٹرز کے مطابق یہ نمی جراثیم اور فنگس کی افزائش کے لیے سازگار ماحول بناتی ہے، جس سے ایتھلیٹس فٹ جیسی بیماریاں پیدا ہوسکتی ہے۔
عضلات کی کمزوری اور درد
مسلسل جوتے پہننے سے پاؤں کے کچھ عضلات سست پڑ جاتے ہیں، جس کی وجہ سے نہ صرف پاؤں میں درد ہوتا ہے بلکہ یہ چلنے پھرنے اور جسمانی وزن اٹھانے کی صلاحیت کو بھی متاثر کرتا ہے۔
اس سے پلینٹر فیشیائٹس اور دیگر پیچیدگیاں جنم لے سکتی ہیں۔
خراب پوسچر اور جسمانی درد
ناقص جوتے یا غلط فٹنگ آپ کے جسم کی ساخت کو بگاڑ کر کمر، گردن اور کولہوں میں درد کا باعث بن سکتے ہیں۔ اگر پاؤں کی حالت درست نہ رہے تو یہ مسائل دائمی ہوسکتے ہیں۔
پاؤں کی حفاظت کیسے کریں
1. دن میں کئی بار جوتے اتار کر اپنے پاؤں کو ہوا میں آزادانہ سانس لینے دیں تاکہ وہ سکون محسوس کریں اور نمی نہ جمع ہو۔
2. اپنے پاؤں کو روزانہ دھوئیں، اچھی طرح خشک کریں اور موئسچرائز کرنا نہ بھولیں تاکہ جلد خشک اور صحت مند رہے۔
3. ہمیشہ ایسے جوتے پہنیں جو آپ کے پاؤں کے سائز اور شکل کے مطابق ہوں اور آپ کو آسانی سے چلنے پھرنے دیں۔
4. جوتوں کو باقاعدگی سے صاف کریں اور دھوپ میں رکھیں تاکہ جراثیم ختم ہوں اور جوتے بدبو دار نہ ہوں۔
5. روزانہ پاؤں کی ہلکی پھلکی ورزش کریں تاکہ عضلات مضبوط اور لچکدار رہیں۔
اپنے پاؤں کی صحت کا خیال رکھنا آپ کی عمومی صحت کے لیے انتہائی ضروری ہے۔ اگر آپ ہمیشہ جوتے پہننے کی عادت رکھتے ہیں تو اسے بدلنے کی کوشش کریں اور وقتاً فوقتاً اپنے پیروں کو آرام دیں۔
یاد رکھیں، صحت مند پاؤں آپ کے پورے جسم کا بُنیادی ستون ہوتے ہیں۔