وقت گزرنے کے ساتھ بڑھاپا آنا ایک فطری عمل ہے جس میں وقت کے ساتھ بتدریج اضافہ ہوتا ہے تاہم حال ہی میں کی جانے والی ایک تحقیق کے مطابق یہ رفتار 50 برس میں کی عمر انتہائی تیز ہوجاتی ہے۔
سائنسدانوں کے مطابق انسان اپنی پوری زندگی میں کئی مراحل سے گزرتا ہے جس میں بچپن کی تیز رفتار نشوونما، جوانی کا استحکام، اور پھر عمر کے ساتھ ساتھ تیزی سے بڑھتی ہوئی جسمانی تنزلی شامل ہے، تاہم تقریباً 50 برس کی عمر زندگی کا وہ اہم موڑ ہے جس میں انسان تیزی سے بڑھاپے کی منازل طے کرتا ہے۔
سائنسدانوں کا کہنا ہے کہ اس عمر میں انسانی بافتوں (tissues) اور اعضاء کی عمر رسیدگی کی رفتار گزشتہ دہائیوں کی نسبت زیادہ تیز ہو جاتی ہے۔
اس تحقیق کے نتائج مختلف عمر کے بالغ افراد میں پروٹین کے تجزیے سے حاصل کیے گئے، اور انکشاف ہوا کہ انسانی رگیں سب سے پہلے اور تیزی سے زوال پذیر ہوتی ہیں۔
چینی اکیڈمی آف سائنسز کے سائنسدانوں کی سربراہی میں کام کرنے والی ٹیم کا کہنا ہے کہ تقریباً 50 برس کی عمر میں جسم کی بافتیں ایک اہم تبدیلی سے گزرتی ہیں، اورخون کی رگیں وہ اہم بافتیں ہیں جو سب سے پہلے اور نمایاں طور پر متاثر ہوتی ہیں۔
اس تحقیق کے لیے مححقین نے 14 سے 68 سال کی عمر کے 76 ایسے افراد کے ٹشوز کے نمونے حاصل کیےجو دماغی چوٹ کے باعث حادثاتی طور پر فوت ہو چکے تھے۔
یہ نمونے جسم کے سات مختلف نظاموں سے لیے گئے جن میں قلبی، نظام ہاضمہ، مدافعتی، غدودی، تنفسی، جلدی اور عضلاتی و ہڈیوں کا نظام شام ہے۔
محققین نے ان بافتوں میں موجود پروٹینز کی فہرست مرتب کر کے عمر بڑھنے کے ساتھ ان میں ہونے والی تبدیلیوں کو نوٹ کیا، انہوں نے نتائج کو بیماریوں اور ان سے جڑے جینیاتی ڈیٹا بیس سے موازنہ کیا اور پایا کہ 48 بیماریوں سے وابستہ پروٹینز کی مقدار عمر کے ساتھ بڑھتی ہے۔
ان بیماریوں میں دل کی بیماریاں، تشوزکی سختی، فیٹی لیور، اور جگر سے متعلق ٹیومر شامل ہیں۔
تحقیق کے مطابق سب سے نمایاں تبدیلیاں 45 سے 55 سال کی عمر کے درمیان دیکھنے میں آئیں، اور یہ تبدیلی خاص طور پرجسم کی سب سے بڑی شریان میں نوٹ کی گئی، اس کے علاوہ لبلبہ (pancreas) اور تلی (spleen) میں بھی مسلسل تبدیلیاں ریکارڈ ہوئیں۔
محققین کا کہنا ہے کہ اس نئی تحقیق سے یہ بات سامنے آئی ہے کہ عمر رسیدگی ایک پیچیدہ، مرحلہ وار عمل ہے جس میں مختلف جسمانی نظام مختلف وقتوں میں متاثر ہوتے ہیں۔ اگر یہ بات پہلے سے معلوم ہو کہ کس عمر میں جسم کا کونسا نظام سب سے زیادہ متاثر ہوتا ہے تو ایسی صورت اس کی بروقت تشخیص اور علاج ممکن ہو سکے گا ، اور بزرگ افراد کی صحت کومزید بہتر بنایا جاسکے گا۔