دنیا بھر میں دل کے امراض اب بھی اموات کی سب سے بڑی وجوہات میں شامل ہیں۔ عام طور پر یہ امراض خوراک، طرزِ زندگی، ذہنی دباؤ یا جینیاتی عوامل سے جوڑے جاتے ہیں، مگر حالیہ سائنسی تحقیق نے ایک دلچسپ انکشاف کیا ہے جس کے مطابق خواتین میں دل کے دورے کے امکانات زیادہ ہیں۔
حال ہی میں سائنسدانوں نے ایک تحقیق میں زمین کے مقناطیسی میدان میں آنے والی غیر معمولی تبدیلیوں اور دل کے دوروں میں اضافے کے درمیان تعلق کا جائزہ لیا۔
اس تحقیق کے نتائج کے مطابق، خاص طور پر خواتین میں دل کے دورے کی شرح سولر اسٹورمز کے دوران نمایاں طور پر بڑھ جاتی ہے۔
سولر اسٹورمز وہ سرگرمیاں ہیں جب سورج کی لہریں زمین کے مقناطیسی ماحول پر اثر ڈالتی ہیں۔
اس کا اثر صرف سیٹلائٹ کمیونیکیشن یا جی پی ایس تک محدود نہیں بلکہ انسانی صحت، خاص طور پر دل کی صحت پر بھی پڑ سکتا ہے۔
برازیل کے نیشنل انسٹیٹیوٹ فار اسپیس ریسرچ کی تحقیق کے مطابق، جب سورج کے ذرات زمین کے مقناطیسی میدان سے ٹکراتے ہیں۔
تو خواتین میں دل کے دورے کے امکانات تقریباً تین گنا بڑھ جاتے ہیں، جبکہ مردوں میں ایسا رجحان نہیں دیکھا گیا۔
تحقیق کے سربراہ ڈاکٹر لوئیس فلیپے کے مطابق، عام حالات میں مردوں میں دل کے دوروں کی شرح خواتین کے مقابلے میں دوگنی ہوتی ہے۔
مگر جب سورج کی سرگرمیوں میں اضافہ ہوتا ہے تو خواتین میں یہ شرح تیزی سے بڑھ جاتی ہے، خاص طور پر 31 سے 60 سال کی درمیانی عمر کی خواتین میں۔
مقناطیسی طوفان یا جیومیگنیٹک اسٹورمز سورج کی لہروں کی وجہ سے پیدا ہوتے ہیں، جن کا زمین کے مقناطیسی میدان پر اثر پڑتا ہے۔
سائنسدانوں کا خیال ہے کہ ان طوفانوں کی وجہ سے خون کا دباؤ، دل کی دھڑکن، اور نیند کے نظام پر اثر پڑ سکتا ہے، جو مجموعی طور پر دل کی صحت کو متاثر کر سکتے ہیں۔
تاہم، یہ معاملہ ابھی تک تحقیق کا موضوع ہے اور مکمل تصدیق باقی ہے۔
یہ تحقیق بلاشبہ ایک ابتدائی مرحلہ ہے اور اس میں کچھ حدود بھی ہیں، جیسے کہ یہ صرف ایک جگہ پر اور محدود نمونے کے ساتھ کی گئی ہے۔
یہ نتیجہ خوف پیدا کرنے کے لیے نہیں بلکہ آگاہی اور مستقبل کی تحقیقات کے لیے بنیاد فراہم کرنے والا ہے۔
اگر آنے والے وقتوں میں اس بات کی مزید تصدیق ہوتی ہے تو ہو سکتا ہے کہ ہم اس کے مطابق دل کے مریضوں کے لیے نئی حفاظتی تجاویز اور پیشگی احتیاطی تدابیر بنا سکیں۔
سورج کی سرگرمی کا ایک 11 سالہ چکر ہوتا ہے جس میں سب سے زیادہ اثر ’سولر میکسیمم‘ کہلاتا ہے۔
رواں سال 2025 کو زیادہ شمسی سرگرمی کا سال سمجھا جا رہا ہے، جس کی وجہ سے زمین کے مقناطیسی طوفان بھی زیادہ مرتبہ آئیں گے۔
اس لیے ضروری ہے کہ ہم ایسے حالات پر پوری تیاری کریں اور دل کے مسائل رکھنے والوں کو خصوصاً ایسے دنوں میں زیادہ محتاط رہنے کی ترغیب دیں۔