توری ایک نرم اور ہلکی سبزی ہے جو زیادہ تر گرمیوں کے موسم میں دستیاب ہوتی ہے۔
یہ نہ صرف ذائقے میں لذیذ ہوتی ہے بلکہ صحت کے لحاظ سے بھی بے حد فائدہ مند ہے، توری کھانے سے درج ذیل زبردست اور انوکھے فوائد حاصل ہوتے ہیں۔
گردوں کی صفائی
توری قدرتی طور پر ریشہ دار یا پانی کی بھرپور مقدار والی سبزی ہے، جو جسم سے فاسد مادوں کے اخراج میں مدد دیتی ہے اور پیشاب کے راستے گردوں کی صفائی میں مؤثر کردار ادا کرتی ہے۔
آنکھوں کی حفاظت
توری میں لُوٹین اور زیکزینتھین جیسے غذائی اجزا موجود ہوتے ہیں جو آنکھوں کو روشنی سے پہنچنے والے نقصان سے محفوظ رکھتے ہیں اور نظر کو بہتر بناتے ہیں۔
زخموں کے جلد بھرنے میں مددگار
توری میں وٹامن سی اور زنک جیسے اہم غذائی اجزا پائے جاتے ہیں جو زخموں کو جلد بھرنے اور جلد کی مرمت میں معاون ثابت ہوتے ہیں۔
نظامِ ہاضمہ کی بہتری
توری میں فائبر کی اچھی مقدار پائی جاتی ہے جو آنتوں کی صفائی، قبض سے نجات اور معدے کو ہلکا رکھنے میں مدد دیتی ہے، یہ نظامِ ہاضمہ کو فعال اور بہتر بناتی ہے۔
جلد کو نکھارنے والی
توری میں موجود اینٹی آکسیڈنٹس اور وٹامن سی جلد کو ترو تازہ بناتے ہیں، جھریوں کی روک تھام کرتے ہیں اور چہرے کو قدرتی نکھار فراہم کرتے ہیں۔
دل کی صحت بہتر بنائے
توری پوٹاشیئم، میگنیشیئم اور فائبر سے بھرپور ہوتی ہے، جو بلڈ پریشر کو متوازن رکھنے میں مدد دیتی ہے اور دل کی بیماریوں کے خطرے کو کم کرتی ہے۔
جگر کیلیے مفید
توری کا استعمال جگر کی گرمی کو کم کرتا ہے اور اسے ڈیٹاکسیفائی کرنے میں مدد دیتا ہے۔ جگر کے امراض میں مبتلا افراد کے لیے یہ ہلکی، محفوظ اور فائدہ مند غذا ہے۔
ذیابیطس کے مریضوں کیلیے مفید
توری میں کاربوہائیڈریٹس کم اور فائبر زیادہ ہوتا ہے، جس کی وجہ سے یہ بلڈ شوگر کو کنٹرول میں رکھنے میں مددگار ہے اور شوگر لیول کو تیزی سے بڑھنے نہیں دیتی۔