ہم میں سے ہر انسان کو کھانا کھانے کے بعد غنودگی اور شدید نیند کا غلبہ محسوس ہوتا ہے۔
دلچسپ بات یہ ہے کہ غذا توانائی کے حصول کا ذریعہ ہوتی ہے مگر کھانے کے بعد چستی کی بجائے غنودگی طاری ہونے لگتی ہے۔
تو اس کی وجہ کافی دلچسپ اور پیچیدہ ہے۔
اس کی وجہ یہ ہے کہ انسانی جسم اتنا سادہ نہیں بلکہ متعدد عناصر کھانے کے بعد طاری ہونے والی غنودگی میں کردار ادا کرتے ہیں۔
درحقیقت ایسی کم از کم 4 وجوہات ہوسکتی ہیں جن کے باعث آپ کھانے کے بعد غنودگی محسوس کرتے ہیں۔
مخصوص غذاؤں میں موجود اجزا
گندم، جو، مکئی، کھیروں، انڈوں، پستے، مچھلی، دودھ، مرغی کے گوشت، مونگ پھلی ، چینی، بیکری کی اشیا، تربوز، چاول، گائے کے گوشت، پنیر اور متعدد دیگر غذاؤں میں میلاٹونین، Tryptophan، کاربوہائیڈریٹس اور چکنائی جیسے اجزا موجود ہوتے ہیں۔
یہ سب اجزا جسم کا حصہ بننے کے بعد غنودگی بڑھاتے ہیں۔
مثال کے طور میٹھی اشیا کھانے کے بعد بلڈ شوگر کی سطح میں اچانک اضافہ ہوتا ہے اور پھر فوری طور پر کمی بھی آتی ہے، جس کے نتیجے میں جسم کو تھکاوٹ کا احساس ہوتا ہے۔
اسی طرح میلاٹونین ایسا ہارمون ہے جو نیند کے حصول میں کردار ادا کرتا ہے اور غذا کی صورت میں جسم کا حصہ بننے کے بعد غنودگی کا احساس بڑھاتا ہے اور یہ متعدد غذاؤں میں بھی موجود ہوتا ہے۔
tryptophan نامی amino ایسڈ سے بھرپور غذاؤں سے بھی غنودگی طاری ہونے لگتی ہے، اس کی وجہ یہ ہے کہ اس سے سیروٹونین بننے کا عمل تیز ہوتا ہے۔
سیروٹونین نامی ہارمون مزاج اور نیند کے حوالے سے اہم کردار ادا کرتا ہے اور جب اس کی سطح میں کھانے کے بعد اضافہ ہوتا ہے تو سستی اور غنودگی محسوس ہونے لگتی ہے۔
بہت زیادہ مقدار میں کھانا (یا پینا)
زیادہ مقدار میں کھانے سے بھی اس احساس کا سامنا ہوتا ہے، خاص طور پر اگر کھانے میں نمک یا پروٹین کی مقدار زیادہ ہو۔
محققین کے خیال میں یہ غنودگی کھانے کو ہضم کرنے میں مدد فراہم کرتی ہے۔
ایک اور تحقیق میں بتایا گیا کہ مغربی غذائیں یعنی فاسٹ فوڈ اور سافٹ ڈرنکس کا استعمال غنودگی کا احساس بڑھاتا ہے۔
دن کا وقت
عام طور پر کھانے کے بعد غنودگی کا احساس دوپہر کو زیادہ ہوتا ہے۔
جاگنے کے بعد وقت گزرنے کے ساتھ دماغ میں ایک کیمیکل adenosine جمع ہونے لگتا ہے جس کی سطح رات کو سونے کے وقت عروج پر ہوتی ہے۔
مگر اس کی سطح دوپہر میں بھی کافی بڑھ جاتی ہے اور کھانا کھانے کے بعد غنودگی کا احساس ہونے لگتا ہے۔
طبی مسائل
ویسے تو کھانے کے بعد غنودگی کا احساس ہونا فکرمند کی بات نہیں مگر کئی بار یہ غنودگی کسی طبی عارضے کا نتیجہ بھی ہوتی ہے۔
ذیابیطس، خون کی کمی، تھائی رائیڈ کے مسائل اور بلڈ پریشر کی سطح میں نمایاں کمی جیسے مسائل کے باعث کھانے کے بعد غنودگی طاری ہونے لگتی ہے۔