دنیا کی طویل العمر خاتون کی زندگی اور عادات پر کی گئی سائنسی تحقیق نے حیران کن نتائج سامنے رکھ دیے ہیں۔ سی این این کی رپورٹ کے مطابق، اسپین کی ماریا برانیئس دنیا کی سب سے معمر خاتون تھیں، جو 117 برس تک زندہ رہیں۔
تحقیق میں ان کے معدے کی صحت کو خاص طور پر نوٹ کیا گیا، جو بالکل بچوں کی طرح مضبوط تھی، جس کی وجہ سے ان کے جسم میں سوزش بالکل نہیں تھی۔
ماریا نے 2024 میں انتقال سے قبل خون، تھوک، پیشاب اور فضلے کے نمونے سائنسدانوں کو فراہم کیے تھے۔
ان نمونوں کے تجزیے سے یہ بات سامنے آئی کہ اگرچہ ان کے خلیے بوڑھے تھے، ان کے جین بالکل جوان لوگوں کی طرح صحت مند تھے۔
سب سے اہم دریافت یہ تھی کہ ان کے آنتوں میں موجود اچھے بیکٹیریا نے جسم کو بیماریوں سے محفوظ رکھا اور سوزش کو کم کرنے میں مدد دی۔
سائنسدانوں کے مطابق، ماریا کے جینز میں کچھ تبدیلیاں موجود تھیں جو عام طور پر عمر بڑھنے کے ساتھ دل کی بیماریوں، ذیابیطس اور اعصابی کمزوری کے امکانات بڑھا سکتی ہیں۔
مگر حیران کن طور پر یہ الزائمر یا پارکنسن جیسی شدید بیماریوں کا سبب نہیں بنیں۔
ماریا کی طویل عمر میں نہ صرف ان کے جینز بلکہ صحت مند طرزِ زندگی کا بھی اہم کردار تھا۔ وہ روزانہ تین بار دہی یا دہی جیسی غذائیں استعمال کرتی تھیں، جو ان کی صحت اور لمبی عمر کا راز بنی۔
جس سے ان کا وزن اور جسمانی صحت متوازن رہی۔ ان کی خوراک میں مچھلی اور زیتون کا تیل بھی شامل تھا۔
ماریا ہمیشہ جسمانی طور پر سرگرم رہیں اور اپنی صحت مند عادات برقرار رکھیں۔ ان کی ذہنی صحت بھی قابل رشک تھی اور وہ عمر رسیدہ ہونے کے باوجود اپنی دلچسپیوں سے دستبردار نہیں ہوئیں۔
انہیں مطالعہ، پیانو بجانا اور باغبانی کرنا بہت پسند تھا، جس سے ان کا دماغ تندرست اور فعال رہتا تھا۔
ماریا نے کبھی سگریٹ یا شراب کا استعمال نہیں کیا اور یہی عوامل ان کی لمبی، صحت مند اور خوشگوار زندگی کا راز بنے۔
سائنس دانوں کا کہنا ہے کہ ماریا کی زندگی اس بات کا ثبوت ہے کہ اچھی غذا، مثبت عادات اور ذہنی سکون نہ صرف بیماریوں سے بچاتے ہیں بلکہ طویل عمر کے امکانات بھی بڑھاتے ہیں۔