دنیا کا مقبول ترین شو ‘ماسٹر شیف پاکستان’ اسکرین پر واپسی کے لیے تیار ہے۔ اس بار یہ شو ہم نیٹ ورک کے معروف چینلز HUM TV اور Masala TV پر نشر کیا جائے گا۔
دنیا کے اس مقبول ترین کوکنگ شو کا پاکستانی ورژن (MasterChef Pakistan) ملک میں لگ بھگ 10 سال پہلے نشر ہوا تھا جس کا پہلا سیزن شیف عمارہ نعمان نے جیتا تھا۔
نئے سیزن کا ٹیزر جاری کر دیا گیا ہے جس کے بعد شائقین کا جوش و خروش لذیذ کھانا دیکھ کر چمک اٹھنے والی بھوک کی طرح بڑھ گیا ہے۔
سیزن 2 کے آڈیشنز کا آغاز دو ماہ قبل ہوا تھا۔ مقابلے کے لیے 24 بہترین اُمیدواروں کا انتخاب ملک کے ماہر شیفز نے خود کیا ہے۔
اس بار جو ججز کھانوں کا ذائقہ پرکھنے کے لیے اسکرین پر جلوہ گر ہوں گے، ان میں شامل ہیں:
- شیف اسد مونگا (Test Kitchen)
- اپنی پھرتی اور خوش مزاجی کے لیے مشہور شیف سعادت
- اور Sugaries کی بانی اور جدید بیکنگ اسٹائل کی ماہر مہوش عزیز
یہ تینوں ججز نہ صرف شیف پاکستان کے نئے سیزن میں جوش بھر دینے والے ہیں بلکہ وہ نئی تراکیب، فیوژن کھانوں اور تجرباتی پکوانوں کو بھی خوش آمدید کہنے کے لیے تیار نظر آتے ہیں۔
یاد رہے کہ ماسٹر شیف کا آغاز 2 جولائی 1990 کو برطانیہ میں BBC پر ہوا تھا۔ پہلے سیزن میں شوقیہ شیفز کو 30 پاؤنڈ کی رقم اور ڈھائی گھنٹے دیے گئے تاکہ وہ تین کورس پر مشتمل کھانا تیار کر سکیں۔
‘بلیک میل کرکے شادی کی’، فیروز خان کا دوسری بیوی پر الزام
وقت کے ساتھ یہ شو دنیا بھر میں مقبول ہوا اور 2005 میں اسے نئے انداز میں “MasterChef Goes Large” کے نام سے پیش کیا گیا، جس نے رئیلیٹی ٹی وی اور ڈرامائی انداز کو ملا کر کھانوں کے مقابلے نشر کرنے کا نیا معیار قائم کیا۔
آج ماسٹر شیف ایک عالمی فرنچائز ہے، جس کے تحت جونیئر ماسٹر شیف، سیلبریٹی ماسٹر شیف اور پروفیشنلز ماسٹر شیف جیسے ذیلی شوز بھی بنائے جا چکے ہیں۔ اس شو نے کئی عام افراد کو پروفیشنل شیف بننے کا موقع فراہم کیا۔
اب سوال یہ ہے کہ کیا ماسٹر شیف پاکستان سیزن 2 بھی انٹرنیٹ پر وہی میمز اور وائرل لمحے پیدا کرے گا جیسے گورڈن ریمزی کے شو کرتے ہیں؟
شاید اس کا جواب شو دیکھنے کے بعد ہی ملے گا جو ہم ٹی وی اور مصالحہ ٹی وی پر نشر ہوگا۔