گلوکار علی ظفر سیلاب متاثرین کے لیے خصوصی فنڈ ریزنگ کنسرٹ کا انعقاد کر رہے ہیں۔ جس میں گلوکار آئمہ بیگ، عارف لوہار، نتاشا بیگ سمیت دیگر شریک ہوں گے۔
کنسٹرٹ 27 ستمبر کو الحمرا میں ہو گا، کنسرٹ سے حاصل رقم سیلاب سے متاثرہ افراد کی بحالی کے لیے خرچ کی جائے گی۔
معروف گلوکار، نغمہ نگار اور صدارتی تمغہ برائے حسنِ کارکردگی حاصل کرنے والے گلوکار علی ظفر نے اپنے کیریئر کے ایک ایسے خصوصی کنسرٹ کا اعلان کیا۔ جس کا مقصد ملک بھر میں حالیہ تباہ کن سیلاب سے متاثرہ افراد کی مدد کے لیے فنڈ ریزنگ کرنا ہے۔
کنسرٹ سے حاصل ہونے والی تمام آمدنی علی ظفر فاؤنڈیشن کے ذریعے متاثرہ خاندانوں کی بحالی اور امداد پر خرچ کی جائے گی، جنہوں نے اس آفت میں اپنے گھر اور روزگار کھو دیے ہیں۔
کنسرٹ کی ٹکٹس کی فروخت کا آغاز ہو چکا ہے، شائقین سے گزارش ہے کہ وہ بھی اس فلاحی کام میں حصہ ڈالیں جہاں موسیقی امید کا پیغام بنے گی۔
علی ظفر نے اپنے پیغام میں کہا کہ کنسرٹ صرف موسیقی نہیں، بلکہ ایک آواز ہے، آئیں ہم سب مل کر اُن لوگوں کے لیے اُمید کا چراغ بنیں جو آج بھی مدد کے منتظر ہیں، آئیں ان کے ساتھ کھڑے ہوں جنہیں ہماری سب سے زیادہ ضرورت ہے۔
یہ ایونٹ نہ صرف موسیقی بلکہ پاکستان کی انسان دوست برادری کے لیے بھی ایک اہم موقع ہے، جہاں فن اور احساس یکجا ہو کر حقیقی تبدیلی لا سکتے ہیں۔
کنسرٹ میں شرکت کے لیے ٹکٹ ہونا لازمی ہے جس کا ٹکٹ آپ ٹکٹ والا سے آن لائن خرید سکتے ہیں اور اپنی عطیات علی ظفر فاونڈیشن کو بھی جمع کرا سکتے ہیں۔