کراچی میں ڈیری فارمرز نے دودھ کی قیمت میں فوری طور پر 50 روپے فی کلو اضافہ کرنے کا مطالبہ کیا ہے۔ کراچی پریس کلب میں پریس کانفرنس کرتے ہوئے ڈیری فارمز ایسوسی ایشن کے رہنماؤں کا کہنا تھا کہ سیلاب کی تباہ کاریوں نے ڈیری فارمرز کو شدید متاثر کیا ہے۔
رہنماؤں نے بتایا کہ شہر کی مختلف کالونیوں میں 10 لاکھ سے زائد جانور موجود ہیں اور یہ انڈسٹری روزانہ 50 لاکھ لیٹر دودھ کراچی کو فراہم کرتی ہے۔
ان کا کہنا تھا کہ ڈیری انڈسٹری میں تقریباً ہر چیز کی قیمت میں 30 فیصد تک اضافہ ہو چکا ہے، اور اگر یہی صورتحال برقرار رہی تو جانوروں کے بھوکے مرنے کا خدشہ ہے۔
رہنماؤں نے مزید کہا کہ ڈیری فارمرز کو یومیہ 30 کروڑ روپے کا نقصان دودھ کی مد میں برداشت کرنا پڑ رہا ہے۔
ڈیری فارمر نے دودھ کی قیمتوں میں اضافے کا مطالبہ کرتے ہوئے کہا کہ دودھ کی فی لیٹر قیمت میں فوری طور پر 50 روپے کا اضافہ ناگزیر ہے۔
ڈیری فارمرز نے یکم اکتوبر تک دودھ کی قیمتوں میں اضافے کا نوٹیفکیشن جاری نہ کرنے کی صورت میں وزیر اعلیٰ ہاؤس کے باہر احتجاج کا اعلان بھی کیا ہے۔