ایشیائی ترقیاتی بینک نے ایشیائی ترقیاتی آؤٹ لک رپورٹ جاری کر دی ہے۔ رپورٹ میں کہا گیا ہے کہ پاکستان کی معیشت درمیانی مدت میں ترقی کی راہ پر گامزن ہے۔ مالی سال 2026 میں جی ڈی پی گروتھ 3 فیصد رہنے کا امکان ہے، جبکہ پالیسی ریفارمز اور معاشی استحکام کے ذریعے معیشت میں بہتری جاری رہے گی۔
رپورٹ کے مطابق، مالی سال 2026 میں مہنگائی 6 فیصد تک بڑھنے کا امکان ہے، جس میں گیس ٹیرف میں اضافہ بھی شامل ہے۔ مرکزی بینک مہنگائی کنٹرول کرنے کے لیے محتاط مانیٹری پالیسی اپنائے گا۔
مزید برآں، رپورٹ میں کہا گیا ہے کہ آئی ایم ایف پروگرام کے تحت پاکستان میں معاشی اصلاحات میں پیشرفت ہوئی ہے۔
پاکستان کی ترقی کے امکانات مثبت ہیں، تاہم ڈھانچہ جاتی چیلنجز برقرار ہیں، جبکہ تعمیراتی شعبے کے لیے بجٹ میں دی گئی مراعات جزوی طور پر نقصانات کم کرنے میں مددگار ثابت ہوں گی۔
اے ڈی بی رپورٹ میں یہ بھی کہا گیا کہ بار بار آنے والی قدرتی آفات اور حالیہ سیلاب معیشت کی ترقی کے لیے خطرہ ہیں۔
سیلاب سے انفرا اسٹرکچر اور زرعی اراضی کو نقصان، شرح نمو پر دباؤ ڈالے گا جب کہ سیلاب سے سپلائی چین متاثر اور خوراک کی قیمتوں میں اضافہ متوقع ہے۔
رپورٹ میں کہا گیا ہے کہ اصلاحات اور پالیسی عملدرآمد سے معیشتی رفتار اور اعتماد برقرار رکھا جا سکتا ہے۔
مالی سال 2026 میں امریکا پاکستان تجارتی معاہدے سے کاروباری اعتماد بحال ہونے کا امکان ہے جب کہ بیرونی زرمبادلہ کے ذخائر میں بہتری اور سرمایہ کاری میں اضافہ متوقع ہے۔