عالمی بینک پاکستان کو رواں مالی سال کے دوران مختلف ترقیاتی منصوبوں کے لیے 2 ارب ڈالر سے زائد قرض فراہم کرے گا۔ دستاویزات کے مطابق یہ قرض انٹرنیشنل ڈیویلپمنٹ ایسوسی ایشن اور انٹرنیشنل بینک فار ری کنسٹرکشن کے ذریعے دیا جائے گا۔
اقتصادی امور ڈویژن کے مطابق پاکستان میں عالمی بینک کی فنڈنگ کے تحت 57 مختلف منصوبوں پر کام جاری ہے، جن کی مجموعی لاگت 16.6 ارب ڈالر ہے۔
ان منصوبوں میں زراعت، پانی، توانائی، فنانس، ریونیو، مواصلات، دیہی و شہری ترقی، ہیومن کیپٹل، سوشل سروسز اور گورننس کے شعبے شامل ہیں۔
عالمی بینک نے گزشتہ سات سال کے دوران پاکستان کو مجموعی طور پر 11.84 ارب ڈالر فراہم کیے ہیں، جن میں سب سے زیادہ رقم، 1.96 ارب ڈالر توانائی کے شعبے کے لیے دی گئی۔
آئندہ برسوں میں مختلف منصوبوں کے لیے مزید 8.6 ارب ڈالر فراہم کیے جائیں گے۔
عالمی بینک نے گزشتہ مالی سال 2024-25 میں 1 ارب 80 کروڑ ڈالر قرضہ دیا، سال 2023-24 میں 2.24 ارب ڈالر، 2022-23 میں 2.12 ارب ڈالر ملے۔
2021،22 میں 1.59 ارب ڈالر، سال 2020-21 میں 2 ارب ڈالر جاری ہوئے جبکہ2019-20 میں 1.37 ارب ڈالر قرضہ دیا گیا۔