عالمی بینک نے پاکستان کے لیے 4 کروڑ 79 لاکھ ڈالر کی گرانٹ کی منظوری دے دی ہے، جو پنجاب میں تعلیم کے فروغ اور اسکول سے باہر بچوں کو تعلیمی نظام میں واپس لانے پر خرچ کی جائے گی۔ عالمی بینک کے مطابق یہ فنڈنگ گلوبل پارٹنرشپ فار ایجوکیشن فنڈ کے تحت فراہم کی گئی ہے، جس سے 40 لاکھ سے زائد بچے مستفید ہوں گے، جن میں پری پرائمری اور پرائمری سطح کے طلبا شامل ہیں۔
بیان میں کہا گیا کہ منصوبے کا مقصد ابتدائی تعلیم تک رسائی کو بڑھانا، اسکول چھوڑنے والے بچوں کو دوبارہ تعلیم میں لانا اور معذور بچوں کے لیے سہولتوں کو بہتر بنانا ہے۔
منصوبے سے براہ راست 80 ہزار آؤٹ آف اسکول بچے اور 1 لاکھ 40 ہزار معذور بچے فائدہ اٹھائیں گے۔
جبکہ 30 لاکھ سے زائد سرکاری اسکولوں کے طلبا اور 8.5 لاکھ غیر رسمی تعلیمی اداروں کے بچے بھی اس سے مستفید ہوں گے۔
مزید برآں، اس پروگرام کے تحت 1 لاکھ اساتذہ اور اسکول لیڈرز کو تربیت اور پیشہ ورانہ ترقی کے مواقع دیے جائیں گے، تاکہ تعلیمی معیار کو بہتر بنایا جا سکے۔
عالمی بینک کا مزید کہنا ہے کہ یہ منصوبہ نہ صرف پنجاب میں سسٹم ریفارمز کا باعث بنے گا بلکہ صوبے کی پائیدار تعلیمی ترقی میں بھی اہم سنگ میل ثابت ہوگا۔
یہ اقدام حکومت پنجاب کے تعلیمی اصلاحاتی ایجنڈے سے مکمل طور پر ہم آہنگ ہے۔