وفاقی وزیر خزانہ سینیٹر محمد اورنگزیب نے کہا ہے کہ سیاست سے بالاتر ہوکر ملک کو آگے بڑھانا وقت کی اہم ضرورت ہے۔ کمالیہ میں سیلاب سے متاثرہ علاقوں کے دورے کے موقع پر میڈیا سے گفتگو کرتے ہوئے انہوں نے بتایا کہ نقصانات کے تخمینے کے لیے سروے جاری ہیں، جبکہ کسانوں کے مسائل کا جائزہ لینے کے لیے خصوصی کمیٹی قائم کر دی گئی ہے۔
ان کا کہنا تھا کہ ملک میں موسمیاتی اور زرعی ایمرجنسی نافذ کی جا چکی ہے، اور اس کے تحت عوام کی مدد کے لیے ہر ممکن اقدام کیا جائے گا۔
سینیٹر اورنگزیب نے مزید کہا کہ وزیراعظم اور آرمی چیف بھی متاثرہ علاقوں کا دورہ کر رہے ہیں تاکہ بحالی اور ریلیف کے اقدامات کو تیز کیا جا سکے۔
وزیر خزانہ نے کہا کہ عالمی سطح پر فیول کی قیمت میں کمی آرہی ہے تو عالمی مہنگائی کا مسئلہ نہیں، ملک کی معیشت بہتری کی جانب گامزن ہے، اقدامات کر رہے ہیں تاکہ مصنوعی مہنگائی پیدا نہ ہو۔