بی ایم ڈبلیو کمپنی نے گاڑیوں کے مالکان کو خبردار کر دیا ہے اور ہدایت کی ہے کہ اپنی لگژری گاڑیاں باہر پارک کریں، کیونکہ بعض ماڈلز میں آگ لگنے کے خطرات سامنے آئے ہیں۔
کمپنی کے مطابق 2015 سے 2021 کے درمیان تیار ہونے والے کچھ ماڈلز میں خرابی پائی گئی ہے، جس کی وجہ سے پانی اسٹارٹر موٹر میں داخل ہو سکتا ہے اور زنگ یا شارٹ سرکٹ کا خطرہ پیدا ہوتا ہے۔
اس کے نتیجے میں گاڑی کھڑی ہونے یا سفر کے دوران آگ پکڑ سکتی ہے۔
بی ایم ڈبلیو اور امریکی نیشنل ہائی وے ٹریفک سیفٹی ایڈمنسٹریشن نے مالکان کو ہدایت کی ہے کہ وہ اپنی گاڑیاں فی الحال گھروں یا عمارتوں سے دور، کھلی جگہوں پر پارک کریں تاکہ کسی بڑے حادثے سے بچا جا سکے۔
کمپنی نے اعلان کیا ہے کہ مرمت کا عمل جلد شروع ہوگا، جس میں اسٹارٹر موٹر اور بعض صورتوں میں بیٹری بھی تبدیل کی جائے گی۔
یہ تمام مرمتیں مالکان کے لیے مفت ہوں گی۔ یہ پہلا موقع نہیں ہے کہ بی ایم ڈبلیو کو ایسی صورتحال کا سامنا کرنا پڑا ہو۔
2018 میں جنوبی کوریا نے کمپنی پر 1 کروڑ ڈالر جرمانہ کیا تھا کیونکہ ایک سال کے دوران 50 گاڑیوں میں آگ لگی تھی۔
اُس وقت بھی تحقیقات میں یہ سامنے آیا تھا کہ کمپنی نے 1 لاکھ 72 ہزار گاڑیوں کو بروقت واپس نہیں بلایا تھا۔