مہنگائی کے بوجھ تلے دبے عوام کے لیے ایک خوش آئند خبر سامنے آئی ہے، کیونکہ آئندہ پندرہ روزہ جائزے میں پیٹرولیم مصنوعات کی قیمتوں میں نمایاں کمی کا امکان ظاہر کیا جا رہا ہے۔ ذرائع کے مطابق حکومت 15 اکتوبر کو نئی قیمتوں کا نوٹیفکیشن جاری کرے گی، جو 16 اکتوبر 2025 کی رات 12 بجے سے ملک بھر میں نافذالعمل ہوں گی۔
ذرائع کا کہنا ہے کہ پیٹرول کی قیمت میں تقریباً 6 روپے 10 پیسے فی لیٹر کمی متوقع ہے، جس کے بعد اس کی نئی قیمت 262 روپے 58 پیسے فی لیٹر ہو سکتی ہے۔
اسی طرح ہائی اسپیڈ ڈیزل کی قیمت میں 97 پیسے فی لیٹر کمی کا امکان ہے، جس سے نئی قیمت 275 روپے 84 پیسے فی لیٹر رہ جائے گی۔
مٹی کے تیل کی قیمت میں 2 روپے 75 پیسے اور لائٹ ڈیزل آئل میں 1 روپے 64 پیسے فی لیٹر کمی کا امکان ظاہر کیا گیا ہے۔
جس کے بعد ان کی ممکنہ قیمتیں بالترتیب 182 روپے 22 پیسے اور 163 روپے 86 پیسے فی لیٹر ہوں گی۔
ذرائع کے مطابق عالمی منڈی میں خام تیل کی قیمتوں میں کمی اور روپے کی ڈالر کے مقابلے میں استحکام کے باعث حکومت کو عوام کو ریلیف دینے کا موقع ملا ہے۔
اس وقت پیٹرول کا ایکس ریفائنری ریٹ 162 روپے 96 پیسے سے کم ہو کر 156 روپے 86 پیسے فی لیٹر ہونے کا امکان ہے، جبکہ ڈیزل کا ریٹ 174 روپے 28 پیسے سے کم ہو کر 173 روپے 31 پیسے فی لیٹر رہنے کا تخمینہ لگایا جا رہا ہے۔
انڈسٹری ذرائع کے مطابق قیمتوں میں یہ متوقع کمی عالمی منڈی میں تیل کی طلب میں معمولی کمی اور قیمتوں کی جزوی اصلاح کا نتیجہ ہے۔
فی الحال پیٹرول کا امپورٹ پریمیم 6.62 ڈالر فی بیرل اور ڈیزل کا 3.20 ڈالر فی بیرل برقرار ہے۔
قومی سطح پر پیٹرول پر 80 روپے 52 پیسے فی لیٹر اور ڈیزل پر 79 روپے 51 پیسے فی لیٹر پٹرولیم لیوی اور کاربن سرچارج عائد ہے۔
ان لینڈ فریٹ ایکوالائزیشن (مارجن آئی ایف ای ایم) پیٹرول کے لیے 8 روپے 69 پیسے جبکہ ڈیزل کے لیے 6 روپے 19 پیسے فی لیٹر ہے، اور اس جائزے کے دوران کسی قسم کی ایکسچینج ریٹ ایڈجسٹمنٹ شامل نہیں کی گئی۔
ماہرین کا کہنا ہے کہ ممکنہ کمی سے مہنگائی کے دباؤ میں کچھ کمی اور ٹرانسپورٹ و لاجسٹکس کے اخراجات میں کمی متوقع ہے۔
اسی طرح روپے کے استحکام اور عالمی سطح پر تیل کی قیمتوں میں نرمی نے وقتی طور پر صارفین کو ریلیف دینے کی گنجائش پیدا کی ہے۔
وزارتِ خزانہ پیٹرولیم مصنوعات کی نئی قیمتوں کا باضابطہ اعلان کل کرے گی، جس کے بعد عوام کے لیے پندرہ روزہ نیا قیمتوں کا فارمولا نافذ ہو جائے گا۔