سیلاب متاثرین کی بحالی اور ٹیکس اہداف پورے کرنے کیلئے حکومت کی جانب سے منی بجٹ لانے پر غور کیا جا رہا ہے۔ ذرائع کے مطابق مجوزہ بجٹ میں لگژری گاڑیوں، سگریٹس اور الیکٹرانک سامان پر اضافی ٹیکس عائد کرنے کی تجویز زیر غور ہے۔
درآمدی اشیاء پر جون میں کم کی گئی ریگولیٹری ڈیوٹی کے برابر لیوی دوبارہ لگانے کا امکان ہے۔
ایف بی آر حکام کے مطابق الیکٹرانکس پر 5 فیصد لیوی لگانے کی تجویز ہے تاہم قیمت کی حد طے ہونا ابھی باقی ہے۔
اسی طرح 1800 سی سی اور اس سے زائد انجن والی گاڑیوں پر بھی اضافی ٹیکس کا امکان ہے، لیکن اس کیلئے آئی ایم ایف کی منظوری لازمی ہوگی۔
حکومت کو توقع ہے کہ اس منی بجٹ سے کم از کم 50 ارب روپے حاصل ہوں گے۔ سگریٹ کے ہر پیکٹ پر 50 روپے لیوی عائد کرنے کی تجویز بھی سامنے آئی ہے۔
یہ لیوی صوبوں کے ساتھ شیئر نہیں کی جائے گی بلکہ اس سے حاصل ہونے والی آمدن براہ راست وفاقی حکومت کو ملے گی۔
ایف بی آر کے مطابق اگست میں ٹیکس وصولی میں 50 ارب روپے شارٹ فال ہوا، اگست میں 951 ارب ہدف کے مقابلے 901 ارب روپے ٹیکس جمع ہوا، جولائی تا اگست ٹیکس ریونیو میں قریباً 40 ارب روپے کمی آئی۔
رواں سال ٹیکس وصولی کا مجموعی ہدف 14 ہزار 131 ارب روپے مقرر ہے تاہم سیلاب، بجلی و گیس کا کم استعمال اور کاروباری سرگرمیوں میں سستی کی وجہ سے ایف بی آر کو ٹیکس شارٹ فال کا سامنا ہے۔