قومی ون ڈے کرکٹ ٹیم کے کپتان محمد رضوان کو عہدے سے ہٹانے کے امکانات بڑھ گئے۔
ذرائع کے مطابق قومی وائٹ بال ٹیم کے غیر ملکی کوچ مائیک ہیسن کسی اور سینئر کھلاڑی کو ون ڈے کی کپتانی سونپنے کے حق میں ہیں۔
مائیک ہیسن نے چیئرمین پاکستان کرکٹ بورڈ (پی سی بی) محسن نقوی کو خط لکھا کہ سلیکشن کمیٹی اور ایڈوائزری کمیٹی کا فوری طور پر اجلاس بلایا جائے۔ تاکہ دیگر امور سمیت کپتان کے حوالے سے کوئی فیصلہ ہو سکے۔
پی سی بی کا تھنک ٹینک کپتانی کی تبدیلی کے حق میں ہے۔ اور اس حوالے سے شاہین آفریدی کے ساتھ ابتدائی مشاورت بھی ہو چکی ہے۔
دوسری جانب پی سی بی کے ترجمان کا کہنا ہے کہ ہیڈ کوچ مائیک ہیسن نے باقاعدہ طور پر چیئرمین پی سی بی محسن نقوی کو ایک خط ارسال کیا۔ جس میں سفارش کی گئی ہے کہ کپتان کا تقرر کرنے کے لیے سلیکشن کمیٹی اور ایڈوائزری کمیٹی کا مشترکہ اجلاس طلب کیا جائے۔
چیئرمین پی سی بی نے اس تجویز کو منظور کرتے ہوئے خط دونوں کمیٹیز کو ارسال کر دیا ہے۔ جس کے بعد 20 اکتوبر کو مشترکہ اجلاس طلب کر لیا گیا۔
توقع ہے کہ اسی اجلاس میں جنوبی افریقہ کے خلاف ون ڈے سیریز کے لیے قومی کپتان کا حتمی فیصلہ کیا جائے گا۔