ماہرین نے خبردار کیا ہے کہ ٹی وی، فون چارجر یا دیگر برقی آلات بند کرنے کے بعد بھی اگر ان کا پلگ سوئچ بورڈ میں لگا رہ جائے تو یہ بجلی خرچ کرتے رہتے ہیں، جسے “فینٹم انرجی” یا “ویمپائر انرجی” کہا جاتا ہے۔
امریکا کی کولمبیا یونیورسٹی کے کولمبیا کلائمیٹ اسکول کے ماہر الیکسز ابرامسن کے مطابق گھروں میں استعمال ہونے والی کل بجلی کا تقریباً 5 سے 10 فیصد حصہ ان ہی غیر استعمال شدہ مگر جڑے رہنے والے آلات سے ضائع ہوتا ہے۔
رپورٹ میں بتایا گیا ہے کہ جدید اسمارٹ ٹی وی بند ہونے کے باوجود 40 واٹ تک بجلی خرچ کرتے ہیں، جو عام ٹی وی کے مقابلے میں 40 گنا زیادہ ہے۔ اسی طرح مائیکروویو اوون، گیمنگ کنسولز، لیپ ٹاپ چارجرز اور دیگر ڈیوائسز بھی بند ہونے کے باوجود توانائی کی کھپت میں حصہ ڈالتی ہیں۔
ماہرین کے مطابق وہ آلات جو اسٹینڈ بائی موڈ پر رہتے ہیں یا جن میں ڈسپلے، گھڑی یا وائی فائی کنکشن مستقل آن رہتا ہے، وہ زیادہ بجلی ضائع کرتے ہیں۔
توانائی کے ضیاع سے بچنے کے لیے ماہرین مشورہ دیتے ہیں کہ استعمال کے بعد تمام ڈیوائسز کے پلگ نکال دیے جائیں اور غیر ضروری طور پر اسٹینڈ بائی موڈ پر رکھی اشیاء کو مکمل طور پر بند کر دیا جائے۔
اگرچہ اس سے بجلی کے بل میں فوری طور پر بڑا فرق نہیں پڑے گا، تاہم طویل مدت میں یہ عادت توانائی کی بچت اور ماحول کی حفاظت میں اہم کردار ادا کر سکتی ہے۔
فیول ایڈجسٹمنٹ، فی یونٹ بجلی مہنگی کر دی گئی