قومی کمپیوٹر ایمرجنسی ریسپانس ٹیم نے کاروباری سافٹ ویئر “سیپ نیٹ ویور” کی سیکیورٹی خامیوں سے متعلق خبردار کر دیا۔
تفصیلات کے مطابق قومی کمپیوٹر ایمرجنسی ریسپانس ٹیم نے خبردار کیا ہے کہ بڑی پیمانے پر استعمال ہونے والے کاروباری سافٹ ویئر “سیپ نیٹ ویور” میں چند سنگین سیکیورٹی خامیاں پائی گئی ہیں۔
حملہ آور دور سے بغیر لاگ ان ہوئے سسٹم کو کنٹرول کر سکتے ہیں۔ جس کے بعد نقصان دہ فائلیں اپلوڈ اور حساس کاروباری ڈیٹا چوری ہو سکتا ہے۔ یہ خامیاں اس قدر خطرناک ہیں کہ اس کو ہیک کے دوران صارف کی کوئی مدد یا کلک کرنے کی بھی ضرورت نہیں ہوتی۔ بلکہ ہیکرز دور سے ہی حملہ کر سکتے ہیں۔ اس لیے ان خامیوں کو بڑا خطرہ تصور کیا جا رہا ہے۔
صارفین کو تجویز دی گئی ہے کہ وہ فوراً “ایس اے پی” کی جانب سے جاری کیے گئے حفاظتی پیچز انسٹال کریں۔ اگر فوری پیچز نہیں لگائے جا سکتے۔ تو نیٹ ورک کو محدود کریں۔ فائلوں کی جانچ سخت کریں اور سسٹم کی نگرانی میں اضافہ کریں۔
کہا گیا کہ مشکوک سرگرمیوں جیسے غیر معمولی کمانڈز، فائل اپلوڈز یا لاگ ان کی کوششوں پر خاص نظر رکھیں۔ اگر سیکیورٹی میں خلل کا شک ہو تو پاس ورڈز فوراً تبدیل کریں۔
جاری کردہ ایڈوائزری میں کہا گیا ہے کہ یہ خطرناک خامیاں کاروباری اداروں کے اہم سافٹ ویئر میں موجود ہیں۔ جو اگر بروقت ٹھیک نہ کی جائیں تو بڑے نقصان کا سبب بن سکتی ہیں۔
اس لیے این سی ای آر ٹی کی جانب سے سختی سے ہدایت جاری کی گئی ہے کہ تمام ادارے جلد از جلد حفاظتی پیچز لگائیں اور نظام کی حفاظت کے لیے خاص اقدامات کریں۔
یہ بھی پڑھیں: سائنسدانوں نے اسٹیل سے 10 گنا مضبوط لکڑی متعارف کرا دی
ٹیم کی جانب سے وارننگ جاری کی گئی ہے کہ یہ خامیاں کاروباری اداروں کے لیے بڑا خطرہ ہیں۔ فوری حفاظتی اقدامات نہ کیے گئے تو ان کے سسٹمز پر حملہ یا اہم ڈیٹا چوری ہو سکتا ہے۔