جنوبی افریقا کے خلاف پہلے ٹیسٹ میچ کے لیے قومی ٹیم کے ممکنہ کھلاڑیوں کے نام سامنے آ گئے ہیں۔ پاکستان اور جنوبی افریقا کے درمیان سیریز کا پہلا ٹیسٹ 12 اکتوبر سے قذافی اسٹیڈیم لاہور میں شروع ہوگا، جہاں دونوں ٹیمیں آج دوپہر ٹریننگ سیشن میں حصہ لیں گی۔
ذرائع کے مطابق ٹیم مینجمنٹ نے پہلے ٹیسٹ کے لیے ابتدائی کھلاڑیوں کی فہرست پر مشاورت شروع کر دی ہے اور ممکنہ طور پر دو فاسٹ بولرز اور دو اسپنرز کے کمبی نیشن کے ساتھ میدان میں اترنے پر غور کیا جا رہا ہے۔
ذرائع کا مزید کہنا ہے کہ عبوری ہیڈ کوچ اظہر محمود اسپنر آصف آفریدی کی بولنگ سے خاصے متاثر ہیں اور ان کے ڈیبیو کے حق میں رائے رکھتے ہیں۔
ذرائع کا بتانا ہے کہ ممکنہ پلئینگ الیون کے لیے عبداللہ شفیق، امام الحق، شان مسعود اور بابر اعظم کے ناموں پر غور کیا جا رہا ہے۔
اس کے علاوہ سعود شکیل، محمد رضوان، سلمان علی آغا، ساجد خان کے نام بھی زیر غور ہیں۔ شاہین آفریدی، نعمان علی اور خرم شہزاد کے ناموں پر بھی غور جاری ہے۔