بھارت کی ریاست کرناٹکا میں مشہور رئیلٹی شو ’’بگ باس کناڈا سیزن 12‘‘ کو ماحولیاتی قوانین کی خلاف ورزی کے باعث اچانک بند کردیا گیا ہے۔
کرناٹک اسٹیٹ پولوشن کنٹرول بورڈ (KSPCB) کی کارروائی کے بعد شو کے اسٹوڈیو کو سیل کر دیا گیا اور تمام شرکا کو فوری طور پر گھر خالی کرنے کا حکم دیا گیا۔
یہ کارروائی اس بنیاد پر کی گئی کہ شو کا اسٹوڈیو ماحولیاتی اصولوں کی کھلم کھلا خلاف ورزی کر رہا تھا اور بغیر کسی اجازت نامے کے کام جاری رکھے ہوئے تھا۔ بورڈ نے فوری طور پر تمام سرگرمیاں روکنے اور بجلی کا کنکشن منقطع کرنے کے احکامات جاری کیے۔ نوٹس ملتے ہی انتظامیہ نے شو میں شریک تمام شرکا کو فوراً گھر خالی کرنے کی ہدایت دی۔
راتوں رات تمام شرکا کو سیکیورٹی کے ساتھ ایگلٹن ریزورٹ منتقل کر دیا گیا تاکہ ان کے قیام کا انتظام کیا جا سکے۔ اس فیصلے کے بعد تقریباً سات سو سے زیادہ افراد، جن میں ٹیکنیکل ٹیم، لائٹنگ اسٹاف، کیمرہ آپریٹرز اور دیگر عملہ شامل تھا، سبھی کو اپنی ڈیوٹی چھوڑ کر گھر واپس جانا پڑا۔
یہ بگ باس ہاؤس خاص طور پر اداکار کچا سدیپ کے وژن پر تیار کیا گیا تھا، جو ایک شاندار محل کی طرح سیٹ کیا گیا تھا اور اس پر تقریباً پانچ کروڑ روپے لاگت آئی تھی۔ شو کا آغاز چند ہفتے قبل بڑے دھوم دھام سے ہوا تھا۔
ریاستی وزیر ماحولیات و جنگلات نے کارروائی کی تصدیق کرتے ہوئے کہا کہ اسٹوڈیو کو کئی بار نوٹس بھیجے گئے تھے، لیکن انتظامیہ نے کوئی سنجیدگی نہیں دکھائی۔ ان کے مطابق، ’’ہم نے واضح کیا تھا کہ ماحولیاتی اصولوں پر عمل ضروری ہے، لیکن انہوں نے جان بوجھ کر نظرانداز کیا۔‘‘
معائنے کے دوران یہ بات سامنے آئی کہ جولی ووڈ اسٹوڈیوز سے بغیر صاف کیے ہوئے گندے پانی کو باہر چھوڑا جا رہا تھا۔ اس کے علاوہ سیوریج ٹریٹمنٹ پلانٹ غیر فعال تھا، کچرا ٹھیک طرح سے الگ نہیں کیا جا رہا تھا، اور دو بڑے ڈیزل جنریٹرز مسلسل چل رہے تھے، جس سے ماحول میں آلودگی پھیل رہی تھی۔
’’بگ باس کناڈا سیزن 12‘‘ کو اب تک کا سب سے بڑا اور شاندار سیزن قرار دیا جا رہا تھا، مگر اس اچانک بندش نے نہ صرف شائقین کو مایوس کیا بلکہ سوشل میڈیا پر بھی بحث چھیڑ دی ہے۔ منتظمین کو مشورہ دیا گیا ہے کہ اگر وہ چاہیں تو عدالت سے رجوع کر سکتے ہیں۔
بگ باس 19،سلمان خان کا میزبانی کا نیا معاہدہ منظر عام پر