چین کے جے۔35 فائٹر طیارے نے اہم عسکری سنگ میل عبور کر لیا، طیارہ دنیا کا دوسرا کیریئر بیسڈ اسٹیلتھ فائٹر بن گیا۔
چینی میڈیا کے مطابق چین نے اپنے تیسرے اور جدید ترین ائیرکرافٹ کیریئر فوجیان سے اسٹیلتھ فائٹر طیارے جے 35 کی کامیاب پرواز سے ایک اہم عسکری سنگ میل عبور کرلیا ہے۔
فوجیان نے تین اقسام کے طیاروں کو کامیابی سے لانچ کیا، ان میں جے 15ٹی، ففتھ جنریشن جے 35 اسٹیلتھ فائٹر اور کے جے 600 ارلی وارننگ اینڈ کنٹرول طیارہ شامل ہے۔
جے 35 اسٹیلتھ فائٹر کا کسی ائیر کرافٹ کیرئیر سے اڑانے بھرنے کا یہ پہلا موقع ہے، ماہرین کا کہنا ہے کہ یہ تجربات چین کی بحری فضائی قوت میں نمایاں اضافہ ہیں اور اس بات کا واضح ثبوت ہیں کہ فوجیان کی لانچ اور ریکوری صلاحیت عالمی سطح پر جدید ترین معیار تک پہنچ چکی ہے۔
چین کی جانب سے یہ تجربات بیجنگ میں ہونے والی ستمبر میں پریڈ سے قبل کئے گئے تھے، فوجیان چین کا پہلا مکمل طور پر ملکی ڈیزائن شدہ ائیرکرافٹ کیریئر ہے، جو دنیا کا سب سے بڑا روایتی ایندھن سے چلنے والا جنگی جہاز سمجھا جاتا ہے۔
یہ تین جدید ترین الیکٹرو میگنیٹک کیٹاپلٹس سے لیس ہے، یہ نہ صرف بھاری طیاروں کو لانچ کرنے کی صلاحیت رکھتا ہے بلکہ زیادہ پروازوں کو بھی ممکن بناتا ہے۔ اس طرح چین نے ایک اور اہم عسکری سنگ میل عبور کر لیا ہے۔