ڈکی بھائی کے بعد رجب بٹ بھی مشکل میں

غیر رجسٹرڈ موبائل ایپس کے زریعے جوئے اور سٹے بازی کی مبینہ ترغیب دینے پر ڈکی بھائی کے بعد رجب بٹ بھی مشکل میں پڑ گئے۔

تفصیلات کے مطابق نیشنل سائبر کرائم انویسٹی گیشن ایجنسی نے معروف یوٹیوبر رجب بٹ کے خلاف جوئے اور سٹے بازی والی غیر رجسٹرڈ موبائل ایپس کی تشہیر کرنے کے الزام میں مقدمہ درج کر لیا ہے۔

ایف آئی آر کے مطابق رجب بٹ نے مختلف سوشل میڈیا پلیٹ فارمز پر ویڈیوز اور اشتہارات کے ذریعے لوگوں کو غیر قانونی ایپس میں سرمایہ کاری پر آمادہ کیا، جس کے نتیجے میں کئی افراد کو بھاری مالی نقصان اٹھانا پڑا۔

نیب کا فراڈ متاثرین کو بازیاب رقوم آن لائن بھیجنے کا فیصلہ

ایجنسی کے مطابق رجب بٹ ایک معروف بیٹنگ ایپ ‘بینومو’ کے برانڈ ایمبیسیڈر بھی ہیں، تاہم یہ ایپ کسی متعلقہ ادارے سے رجسٹرڈ نہیں ہے، اور نہ ہی اسے پاکستان میں قانونی حیثیت حاصل ہے۔

این سی سی آئی اے حکام کا کہنا ہے کہ رجب بٹ کو متعدد بار انکوائری کے لیے طلب کیا گیا، تاہم پیش نہ ہونے پر ان کے خلاف قانونی کارروائی عمل میں لائی گئی۔ ایجنسی کے مطابق وہ غیر قانونی آن لائن سرگرمیوں کے خلاف زیرو ٹالرنس پالیسی پر عمل پیرا ہے۔

یاد رہے کہ اس سے قبل 17 اگست کو یوٹیوبر سعد الرحمان عرف ڈکی بھائی کو لاہور ایئرپورٹ سے گرفتار کیا گیا تھا۔

ان پر بھی اسی نوعیت کے الزامات عائد کیے گئے تھے کہ وہ غیر رجسٹرڈ آن لائن ٹریڈنگ اور جوا کھیلنے والی ایپس کی سوشل میڈیا پر تشہیر کر کے نوجوانوں کو گمراہ کر رہے تھے۔

سرکاری ملازمین کو ریٹائرمنٹ پر کتنی رقم ملے گی؟ بناولنٹ فنڈ پالیسی میں تبدیلی کا فیصلہ

این سی سی آئی اے اور نیشنل انویسٹی گیشن ایجنسی کی جانب سے سوشل میڈیا پر جاری جوئے، سٹے بازی اور مالی فراڈ میں ملوث عناصر کے خلاف کارروائیاں جاری رکھنے کا اعلان کیا گیا ہے۔