لاہور: پنجاب کی سینئر وزیر مریم اورنگزیب نے کہا ہے کہ سیلاب سے متاثر ہونے والے 15 اضلاع میں ہائی الرٹ کر دیا گیا ہے۔ اور اس وقت لوگوں کی جانیں بچانا سب سے بڑا کام ہے۔
سینئر وزیر پنجاب مریم اورنگزیب نے پریس کانفرنس کرتے ہوئے کہا کہ 20 لاکھ سے زائد افراد سیلاب کے باعث متاثر ہوئے ہیں۔ اور ساڑھے 7 لاکھ افراد کو محفوظ مقام پر منتقل کیا گیا ہے۔
انہوں نے کہا کہ پنجاب کی تاریخ میں سب سے بڑا ریسکیو آپریشن کیا گیا۔ اور 5 لاکھ سے مویشیوں کو محفوظ مقامات پر منتقل کیا گیا۔ 400 سے زائد وٹنری کیمپس لگائے گئے ہیں۔ جبکہ مویشیوں کے چارے کا بھی بندوبست کیا گیا۔
مریم اورنگزیب نے کہا کہ سیلاب سے متاثرہ علاقوں میں امدادی کارروائیاں جاری ہیں۔ اور نالوں میں تجاوزات کے خاتمے کا سلسلہ بھی جاری ہے۔ سیلابی صورتِ حال ختم ہونے کے بعد نقصانات کا تخمینہ لگا کر ازالہ کیا جائے گا۔
انہوں نے کہا کہ راوی، ستلج اور چناب میں سیلاب کی صورت حال ہے۔ اور چناب میں خانکی کے مقام پر اونچے درجے کا سیلاب ہے۔ قادرآباد میں بھی سیلاب کی صورتِ حال برقرار ہے اور رواس برج پر بھی اونچے درجے کا سیلاب ہے۔
یہ بھی پڑھیں: مختلف شہروں میں بارش کا امکان ، اربن فلڈنگ کا الرٹ جاری
صوبائی وزیر نے کہا کہ تریموں برج سے 3 لاکھ 61 ہزار کیوسک کا ریلا گزر رہا ہے۔ راوی میں جسڑ کے مقام پر درمیانے درجے کا سیلاب ہے۔ اور بلوکی ہیڈ ورکس پر 2 لاکھ 82 ہزار کیوسک کا ریلا گزر رہا ہے۔ جبکہ ستلج میں گنڈا سنگھ والا پر پانی کا بہاؤ انتہائی تیز ہے۔
انہوں نے کہا کہ لوگوں کو محفوظ مقامات پر منتقل کرنے کا سلسلہ جاری ہے۔ تاہم متاثرہ علاقوں سے انخلاء کا عمل مکمل ہو چکا ہے۔ تحصیل اور ضلعی سطح پر ہنگامی بنیادوں پر ریلیف کا کام کیا جا رہا ہے۔ عوام سے درخواست ہے کہ انتظامیہ کے ساتھ تعاون کریں۔