متحدہ عرب امارات کے جارح مزاج مڈل آرڈر بلے باز آصف خان نے پاکستانی ٹیم سے شکست کی وجہ اپنی ٹیم کی ناتجربہ کاری کو قرار دیا۔ شارجہ میں پاکستانی ٹیم کے خلاف میچ کے بعد پریس کانفرنس میں آصف خان نے کہا کہ اگر ٹیم زیادہ تجربہ کار ہوتی تو نتیجہ مختلف ہو سکتا تھا۔
انہوں نے کہا کہ ہم نے بڑی ٹیموں کو ویک اپ کال دی ہے اور ایشیا کپ کے لیے پراعتماد ہیں۔
پاکستان کے خلاف 35 گیندوں پر 77 رنز کی شاندار اننگ کھیلنے کے بعد آصف خان نے بتایا کہ ہمارا پلان آخری اوورز میں پاور ہٹنگ کا تھا، لیکن پاکستان کی بولنگ نے اسے کامیاب نہیں ہونے دیا۔
انہوں نے اماراتی کپتان محمد وسیم کی کارکردگی کو سراہا، تاہم محمد وسیم کے رن آؤٹ کو نقصان دہ قرار دیا۔
آصف خان نے کہا کہ شارجہ ہمارا ہوم گراؤنڈ ہے اور پچھلے ہفتوں کی بھرپور ٹریننگ کا پھل ضرور ملے گا۔
انہوں نے مزید کہا کہ اماراتی ٹیم کی اصل طاقت ٹی 20 فارمیٹ میں ہے اور اگر ہم بالنگ کے ذریعے حریف کو 170 یا 180 رنز تک محدود کر دیں تو جیت کے امکانات روشن ہیں۔
آصف خان 1990 میں لاہور میں پیدا ہوئے اور وہ 2007 سے 2014 تک 32 فرسٹ کلاس میچ کھیل چکے ہیں۔
یاد رہے کہ 3 ملکی سیریز کے دوسرے ٹی 20 میچ میں پاکستان نے متحدہ عرب امارات کو 31 رنز سے شکست دی ہے۔
گزشتہ روز شارجہ میں کھیلےگئے میچ میں پاکستان نے یو اے ای کو میچ جیتنےکے لیے 208 رنز کا ہدف دیا تھا جس کے جواب میں اماراتی ٹیم 20 اوور میں 8 وکٹ کے نقصان پر 176 رنز بناسکی۔