لاہور: عدالت نے پنجاب کے نجی اسکولوں کی تعطیلات سے متعلق تعلیمی کیلنڈر اور رولز بنانے کے لیے کمیٹی تشکیل دے دی۔
لاہور ہائی کورٹ میں اسکولوں میں تعطیلات میں اضافے سے متعلق نوٹیفکیشن کی سماعت ہوئی۔ ہائیکورٹ کے جسٹس جواد حسن نے حکم دیا کہ کمیٹی کا پہلا اجلاس 11 ستمبر کو منعقد کیا جائے۔ اور 16 ستمبر کو عدالت میں عملدرآمد رپورٹ پیش جائے۔
درخواست گزار کی جانب سے مؤقف اختیار کیا گیا کہ حکومت کی جانب سے کوئی بھی تعلیمی کیلنڈر مہیا نہیں کیا گیا۔ اور نجی اسکول سلیبس کو سامنے رکھتے ہوئے خود ہی تعلیمی کیلنڈر بناتے ہیں۔ پنجاب حکومت کی جانب سے تعطیلات مین اضافے کا نوٹیفکیشن غیر قانونی ہے۔ لہٰذا عدالت نوٹیفکیشن کالعدم قرار دے کر رولز بنانے کا حکم دے۔
سرکاری وکیل نے عدالت کو بتایا کہ گرمی کی چھٹیاں قانون کے مطابق بڑھائی گئی ہیں۔ موسمی صورتحال اور پی ڈی ایم اے کے الرٹ کے باعث احتیاطی تدابیر اپنائی گئیں۔
عدالت نے محکمہ اسکول ایجوکیشن پنجاب کو تعلیمی سال کے لیے اسپیشل رولز بنانے کا حکم دیتے ہوئے سیکرٹری اسپیشل ایجوکیشن، ایڈووکیٹ جنرل پنجاب، سیکرٹری قانون سمیت دیگر پر مشتمل 13 رکنی کمیٹی بنانے کا حکم جاری کر دیا۔
یہ بھی پڑھیں: پی ڈی ایم اے نے سیلاب کے باعث نقصانات کی رپورٹ جاری کر دی
عدالت نے فیصلے میں لکھا کہ کمیٹی تعلیمی سال اور خصوصاً چھٹیوں کی تجویز کے حوالے سے اسپیشل رولز بنائے گی۔، کمیٹی کی پہلی میٹنگ سیکرٹری اسکولز ایجوکیشن کے دفتر میں 11 ستمبر کو منعقد ہو گی۔
لاہور ہائیکورٹ نے 16 ستمبر کو فریقین سے عمل درآمد رپورٹ طلب کر لی۔
واضح رہے کہ آل پاکستان پرائیویٹ اسکول مینجمنٹ ایسوسی ایشن نے اسکولوں کی تعطیلات میں اضافے کے نوٹفکیشن کو لاہور ہائیکورٹ میں چیلنج کر رکھا تھا۔