خاتون سے مبینہ زیادتی کے الزام میں پاکستانی کرکٹر حیدر علی کو مانچسٹر میں گرفتار کرنے کے بعد ضمانت پر رہا کر دیا گیا۔ انگلش پولیس نے حیدر علی کو دو ہفتے بعد دوبارہ طلب کر لیا ہے، اور اس دوران ان پر برطانیہ چھوڑنے کی پابندی عائد ہے۔
یہ واقعہ پاکستان شاہینز کے حالیہ دورہ انگلینڈ کے دوران پیش آیا۔ ادھر پاکستان کرکٹ بورڈ (پی سی بی) نے حیدر علی کو معطل کر دیا ہے۔
بورڈ کے مطابق وہ مانچسٹر پولیس کے ایک کرمنل کیس میں شامل تفتیش ہیں، جس کے باعث یہ اقدام اٹھایا گیا۔
پی سی بی کا کہنا ہےکہ حیدر علی کو قانونی معاونت فراہم کی جائےگی تاکہ ان کے حقوق کا تحفظ یقینی بنایا جاسکے۔کیس کے نتائج سامنے آنے تک حیدر علی معطل رہیں گے۔
پی سی بی کے مطابق قانونی کارروائی مکمل ہونے کے بعد انضباطی کارروائی پر غور ہوگا، قانونی کارروائی کے خاتمے تک پاکستان کرکٹ بورڈ مزید کوئی تفصیلات جاری نہیں کرےگا۔