پاکستان اور بنگلا دیش کے تعلقات میں تاریخی پیش رفت سامنے آگئی ،20 سال بعد پاک بنگلا دیش نویں جوائنٹ اکنامک کمیشن کا اجلاس ڈھاکہ میں منعقد ہواجو دونوں ممالک کے درمیان دو طرفہ اقتصادی اور ترقیاتی تعاون کو مضبوط بنانے کی جانب اہم سنگ میل قرار دیا جارہا ہے۔
اجلاس کی مشترکہ صدارت وفاقی وزیر پٹرولیم علی پرویز ملک اور بنگلا دیش کے مشیر برائے خزانہ ڈاکٹر صالح الدین احمد نے کی۔
جاری اعلامیے کے مطابق پاکستان کی جانب سے بنگلا دیش کو کراچی پورٹ ٹرسٹ کے استعمال کی پیشکش کی گئی،کراچی پورٹ کے ذریعے بنگلہ دیش چین اور وسطی ایشیائی ممالک سمیت علاقائی ممالک کے ساتھ تجارت کر سکے گا ۔
بنگلا دیش کی عبوری حکومت نے عام انتخابات کا اعلان کر دیا
اجلاس میں دونوں ممالک کی قومی شپنگ کارپوریشنز کے درمیان تعاون بڑھانے کی اہمیت پر زوردیا گیا۔پاکستان اور بنگلہ دیش کے درمیان ڈائریکٹ فلائٹ شروع کرنے کے لیے کام تیز کرنے پر بھی اتفاق کیا گیا۔
پاکستان حلال اتھارٹی اور بنگلہ دیش اسٹینڈرڈز اینڈ ٹیسٹنگ انسٹی ٹیوٹ کے درمیان حلال ٹریڈ میں تعاون کی مفاہمتی یادداشت پر دستخط کئے گئے،اس ایم او یو سے حلال مصنوعات کے معیار اور سرٹیفیکیشن میں تعاون کو بڑھانے کا راستہ ہموار ہو گا۔
پاکستان بنگلا دیش نالج کوریڈور کے قیام پر بھی زوردیا گیا،نالج کوریڈور کے تحت بنگلا دیشی طلبہ کے لیے پاکستان میں 500 نئی اور مکمل فنڈڈ اسکالرشپس کی تجویز دی گئی۔
اعلامیے میں مزید کہا گیا کہ پاکستان نے پاکستان ٹیکنیکل اسسٹنس پروگرام کے تحت تربیتی سیٹ کی تعداد 5 سے بڑھا کر 25 کر دی ۔
دونوں ممالک کے درمیان تجارت، سرمایہ کاری اور صنعت، توانائی، موسمیاتی تبدیلی، انفارمیشن ٹیکنالوجی میں تعاون پر اتفاق کیا گیا۔
بنگلا دیشی سپریم کورٹ نے جماعت اسلامی کی رجسٹریشن بحال کر دی
اس کے علاوہ زراعت، ٹرانسپورٹ و مواصلات، تعلیم، بینکنگ، صحت، سیاحت، اطلاعات و نشریات، اور ٹیکسٹائل سیکٹر میں بھی تعاون شامل ہے۔دونوں ممالک کے درمیان طبی اور مذہبی سیاحت کے شعبوں میں تعاون پر بھی اتفاق کیا گیا۔
اس موقع پر وفاقی وزیر پٹرولیم علی پرویز ملک نے کہا کہ بنگلا دیش کی مہمان نوازی پر مشکور ہیں ،دونوں ممالک کے درمیان تعلقات باہمی احترام اور دوستی پر مبنی ہیں۔اجلاس کے اختتام پر، دونوں ممالک نے مشترکہ اقتصادی کمیشن کے نویں اجلاس کے متفقہ منٹس پر دستخط کیے۔