امریکی صدر ڈونلڈ ٹرمپ نے پاک افغان مسائل کے حل میں دلچسپی کا اظہار کرتے ہوئے کہا ہے کہ وہ جلد ہی اس معاملے کو حل کرنے کی صلاحیت رکھتے ہیں۔ ملائیشیا کے دارالحکومت کوالالمپور میں جاری آسیان سمٹ سے خطاب کرتے ہوئے ٹرمپ نے کہا کہ انہوں نے پچھلے 8 ماہ میں تھائی لینڈ اور کمبوڈیا کے درمیان جنگوں کو روکنے میں کامیابی حاصل کی ہے اور ایک اور جنگ روکنا ابھی باقی ہے۔
صدر ٹرمپ نے مزید کہا کہ انہیں معلوم ہوا ہے کہ پاکستان اور افغانستان کے درمیان دوبارہ مسائل پیدا ہو گئے ہیں، اور انہیں یقین ہے کہ وہ اس مسئلے کو حل کرنے میں مدد کر سکتے ہیں۔
انہوں نے کہا کہ وہ دونوں ممالک کے حالات اور معاہدوں سے اچھی طرح واقف ہیں اور پاک افغان مسائل کو جلد اور مؤثر طریقے سے حل کریں گے۔
صدر ٹرمپ نے کہا کہ پاکستان کے وزیراعظم اور فیلڈ مارشل اچھے لوگ ہیں، مجھے دونوں پر اعتماد ہے، اس میں کوئی شک نہیں ہے کہ ہم پاک افغان مسئلہ جلد حل کر لیں گے۔